Xaçmazın Köhnə Xudat kəndində məktəblilərin keçidi üçün quraşdırılan işıqfor sürücülərin etirazına səbəb olub.
Shimal.News xəbər verir ki, Xudat–Qusar yolunda yerləşən işıqfor şagirdlərin qarşı tərəfə təhlükəsiz keçməsi üçün nəzərdə tutulub.
Sürücülərin bildirdiyinə görə, qurğu gün ərzində fasiləsiz fəaliyyət göstərir və məktəblilərin yoldan keçmədiyi vaxtlarda da avtomobillərin hərəkətini məhdudlaşdırır. Bu isə xüsusilə yolda piyada və nəqliyyat vasitəsinin olmadığı anlarda gözləmələrə səbəb olur.
Onlar hesab edirlər ki, məktəblilərin keçid saatları nəzərə alınmaqla daha məqsədəuyğun hərəkət rejimi tətbiq edilə bilər. Sürücülərin fikrincə, ərazidə aydın nişanlanmış piyada keçidinin yaradılması da məsələnin həllinə kömək edə bilər.
Kənddə yolun vəziyyəti ilə bağlı da iradlar səsləndirilir. Asfalt örtüyündə çatlar, dalğalanmalar və digər nahamarlıqlar var. Yolun kənarlarında su yığıntıları və çınqıllı sahələrə də rast gəlinir.
Sürücülər aidiyyəti qurumlardan Köhnə Xudatdakı yol şəraitinə baxış keçirilməsini, piyada keçidinin düzgün təşkil olunmasını, işıqforun fəaliyyət rejiminin qiymətləndirilməsini və asfalt örtüyünün bərpasını xahiş edirlər.
