Xaçmazın Xudat şəhərində əhaliyə xidmət göstərən tibb müəssisəsində illərdir davam edən təmir işləri başa çatmayıb, ərazidə isə ciddi çatışmazlıqlar qalır.
Shimal.News xəbər verir ki, hazırda Ailə Sağlamlıq Mərkəzi və Təcili Tibbi Yardım bölməsi kimi fəaliyyət göstərən tibb müəssisəsinin binaları və həyəti baxımsız vəziyyətdədir.
Ərazidə sınıq pəncərə şüşələri, divarlardan sallanan açıq elektrik naqilləri, gölməçələr və köhnəlmiş infrastruktur diqqət çəkir. Həyətdə yerləşən sanitar qovşağının qapısında isə "Ayaqyolu işləmir" yazısı vurulub.
Sakinlər tibbi xidmətlərin belə şəraitdə göstərilməsindən narazılıq edirlər.
1958-ci ildə inşa olunan ikimərtəbəli binalarda əsaslı təmirə 2023-cü ilin noyabrında başlanılıb. İşlərin 6 ay ərzində yekunlaşdırılaraq müəssisənin tam istifadəyə verilməsi nəzərdə tutulsa da, təmir prosesi başa çatmayıb.
Tibb müəssisəsi Xudat şəhəri ilə yanaşı, ətraf kəndlərin sakinlərinə də xidmət göstərir. Bildirilir ki, ümumilikdə təxminən 60 min nəfər bu tibb müəssisəsinin xidmətlərindən yararlanır.
Təmir-bərpa işləri TƏBİB-in sifarişi ilə həyata keçirilir. Sakinlər işlərin nə zaman yekunlaşdırılacağı və müəssisənin tam fəaliyyətə başlayacağı ilə bağlı aidiyyəti qurumlardan açıqlama gözləyirlər.
