Qusar rayonunda dövlət sərhədini qanunsuz yolla keçməyə cəhd göstərən şəxs həbs edilib.
Qusar rayon sakini, 1967-ci il təvəllüdlü Adil Qurbanov (ad və soyad şərtidir – red.) işləmək məqsədilə Rusiyaya getmək istəsə də, quru sərhədlərin bağlı olması səbəbindən bu istəyini həyata keçirə bilməyib.
Bundan sonra o, sərhədi qanunsuz yolla keçmək qərarına gəlib. Adil Qurbanov bunun üçün Samur çayını üzüb keçməyi planlaşdırıb.
O, Qusar rayonunun Həzrə kəndi ərazisindən Samur çayına girərək çayı üzüb keçib. Dağıstan Respublikası istiqamətində dövlət sərhədini keçərkən Dövlət Sərhəd Xidmətinin əməkdaşları tərəfindən saxlanılıb.
Faktla bağlı cinayət işi başlanılıb və məhkəmənin qərarı ilə A.Qurbanov barəsində həbs qətimkan tədbiri seçilib.
İstintaq yekunlaşdırılaraq cinayət işi məhkəməyə göndərilib. Məhkəmənin hökmü ilə A.Qurbanov 6 ay müddətinə azadlıqdan məhrum edilib.
Mənbə: Oxu.аz
