Quba rayonunun ərazisindən keçən Qaraçay, Vəlvələçay və Qudyalçayda monitorinqlərə başlanılıb.
Qərar Shimal.News-un əvvəllər işıqlandırdığı qanunsuz hasilat və çay yataqlarında qazıntıların fəsadları ilə bağlı materiallar fonunda diqqət çəkir.
Quba Rayon İcra Hakimiyyəti başçısının 9 oktyabr 2026-cı il tarixli, 103 nömrəli sərəncamı ilə yaradılan komissiyanın ilk iclası keçirilib.
İclasda müvafiq icazə sənədləri olmadan çay yataqlarında avadanlıq yerləşdirən və qum-çınqıl hasilatına cəhd göstərən şəxslərin fəaliyyətinin qarşısının alınması müzakirə olunub. Ardınca hər üç çayda monitorinqlər və ölçmə işləri aparılıb. Qanunsuz fəaliyyətə cəhdlə əlaqəli avadanlıqların aşkarlanması və ərazidən çıxarılması istiqamətində tədbirlərə başlanılıb.
Redaksiyamız daha əvvəl bu mövzuda bir neçə material dərc edib. Karxanaların nəzarətsiz olması, 25 metrdən dərin qazılan kanyonlar, qanunsuz çınqıl-qum qarışığı hasilatı və sakinlərin çaylarda qazıntıların fəsadları ilə üzləşməsi barədə məlumat yayıb.
Yeni komissiyanın monitorinqlərə başlaması əvvəlki materiallarda qaldırılan məsələlər fonunda əhəmiyyət daşıyır. İndi əsas diqqət yoxlamaların nəticələrinə, icazəsiz fəaliyyətin qarşısının alınmasına və çay yataqlarının mühafizəsi üçün görüləcək konkret tədbirlərə yönəlir.
İcra hakimiyyətinin məlumatına görə, yerli bələdiyyələrə və aidiyyəti qurumlara ekoloji maarifləndirmənin gücləndirilməsi, hüquq-mühafizə orqanları ilə birgə nəzarət mexanizmlərinin tətbiqi də tapşırılıb.
