İsmayıllıda keçirilən antikorrupsiya əməliyyatı zamanı həbs edilən bələdiyyə sədri Cahangir Surxayevin məhkəməsi başa çatıb.
Şəki Ağır Cinayətlər Məhkəməsi hökmü elan edib.
İş materiallarına əsasən, Cahangir Surxayev Diyallı kənd bələdiyyəsinin sədri vəzifəsini icra etdiyi müddətdə arıçılıq təsərrüfatı üçün torpaq icarəyə götürmək istəyən kənd sakini İlham Əsgərov ona müraciət edib. C.Surxayev bələdiyyə üzvlərinin ümumi yığıncağını keçirmədən, açıq hərrac və ya müsabiqə təşkil etmədən 2,6 hektar torpaq sahəsini 5 il müddətinə icarəyə verib. Bunun müqabilində o, İlham Əsgərovdan hissə-hissə 22 min manat alıb.
Bələdiyyə sədri aldığı pulun 19 min manatını şəxsi mənafeyi üçün xərcləyib. O, qalan 3 min manatı alarkən İsmayıllıdakı "Orman" restoranında Baş prokuror yanında Korrupsiyaya qarşı Mübarizə Baş İdarəsinin əməkdaşları tərəfindən saxlanılıb.
Keçmiş bələdiyyə sədri məhkəmədə rüşvət almaqda təqsirli olmadığını bildirib. O, məqsədinin qanuni prosedurlara əməl etmədən İlham Əsgərovu aldadaraq pulunu ələ keçirmək olduğunu deyib və buna görə əməlinin dələduzluq kimi qiymətləndirilməli olduğunu bildirib.
Surxayev valideynlərinin və övladlarının müalicəsi üçün bankdan kredit götürdüyünü, bəzi borclarını ödəyə bilmədiyini qeyd edərək məhkəmədən yüngül cəza təyin etməsini xahiş edib.
Günay Aşurovanın sədrlik etdiyi məhkəmə kollegiyası Cahangir Surxayevə qarşı irəli sürülmüş ittihamları sübuta yetirilmiş hesab edib. Hökmə əsasən, o, vəzifə səlahiyyətlərini aşmaqda, vəzifə saxtakarlığında və külli miqdarda rüşvət almaqda təqsirli bilinərək 8 il 1 ay müddətinə azadlıqdan məhrum edilib.
Mənbə: Qafqazinfo.аz
