Qusarda 16 yaşadək qızlar arasında voleybol üzrə açıq kubok yarışı keçirilib. Bu haqda ShimalNews 28 may tarixində məlumat verir.
Olimpiya İdman Kompleksində keçirilən yarış 28 May - Müstəqillik Gününə həsr olunub. Burada Bakının "Sərhədçi", "Aura" və "Murov", eləcə də Quba, Xaçmaz və Qusarın komandaları mübarizə aparıblar.
Tədbirin bədii hissəsində "Show Group Lezginka" rəqs qrupu və qusarlı tanınmış müğənni Cəmilə Zalovanın çıxışları tamaşaçıların alqışları ilə qarşılanıb.
Daha sonra yarışa start verilib. Reqlamentə əsasən, Qusar, Xaçmaz və Bakının "Murov" komandaları A qrupunda, Quba və Bakı ("Sərhədçi" və "Aura") B qrupunda çıxış edib.
Qrup mərhələsində daha yaxşı nəticə göstərən Xaçmaz, Quba, "Murov" və "Sərhədçi" komandaları yarımfinala yüksəliblər. Finalda Xaçmaz Qubaya 2:0, "Murov" isə "Sərhədçi"yə 2:0 qalib gəlib.
Quba 3-cü yer uğrunda görüşdə "Sərhədçi"ni 2:0 üstələyərək, bürünc medala yiyələnib. Finalda Xaçmaz komandasını 2:0 hesabı ilə üstələyən "Murov" isə turnirin qalibi olub.
Mükafatlandırma mərasimində Milli Məclisin Qusardan olan deputatı Azər Badamov, YAP Qusar rayon təşkilatının sədri David İbrahimxəlilov, Quba-Xaçmaz Regional Gənclər və İdman İdarəsinin rəisi Nəcəf Novruzov, Qusar rayon İcra Hakimiyyətinin məsul əməkdaşı Ceyhun Hacıyev çıxış ediblər.
Sonda Quba komandasına bürünc, Xaçmaz kollektivinə gümüş medallar verilib. Turnirin qalibi "Murov" komandası isə qızıl medal və kubokla təltif olunub.
