AFFA Region Liqasının son qalibi olan “Şimal” futbol klubunun prezidenti Qılman İbrahimov hədəflərdən danışıb. Bu haqda ShimalNews 29 may tarixində “Report”-a istinadən məlumat verir.
“I və II Liqanı izləmişəm. Demək olmaz ki, II Liqa Region Liqasından bir neçə dəfə üstündür. Müəyyən klublar var ki, fərqlənir. Məsələn, “Baku Sportinq”in II Liqa səviyyəsindən daha üstün olduğu görünürdü. 2-6-cı yerlərdəki komandaların isə demək olar, səviyyələri bərabər idi. Qalanları elə Region Liqasının öndə gedən klublarından heç də fərqlənmirdilər”, - deyə Q.İbrahimov deyib.
Klub rəsmisini ən çox narahat edən məqamlardan biri stadionlar olub: "Bəzi klubların stadionları çox bərbad haldadır. Ev oyunlarımızı Siyəzəndə keçirirdik. Qonaq komandaları qəbul edəndə xəcalət çəkirdim. Amma II Liqa komandalarının bəzilərinin meydanına baxanda düşünürdüm ki, Siyəzəndəki stadion standartlara daha çox uyğundur. İdeal futbol istəyən adam yaxşı şərait yaratmalıdır. Təəssüf ki, bu gün “Şəmkir”in, “Ağdaş”ın stadionları bərbad haldadır. Ümumiyyətlə, bu, Azərbaycan futbolunun yaralı yeridir”.
O, planlar haqqında da danışıb: “Region Liqasında nəticə qazandıq. Böyük ölçüdə heyətimizi saxlayacağıq. 2012-ci ildən bəri Region Liqasında ilk haldır ki, bir klubun heyəti təmsil etdiyi regiondan olan futbolçulardan ibarətdir. Yəni futbolçularımızın hamısı şimal bölgəsindəndir. Onlardan 19 nəfəri Xaçmaz, üçü Quba, beşi isə Qusardandır. II Liqa üçün maksimum 3, ya 4 futbolçu götürməyi nəzərdə tutmuşuq. Legioner almağı düşünmürük. Premyer Liqa klublarının əvəzedicilərində çıxış edən futbolçularımız var. Qış fasiləsində futbolçularımızdan Tofiq Nəsibov “Turan Tovuz”a transfer olunmuşdu. Bundan əlavə, “Səbail”də, “Sabah”da oyunçularımız var ki, komandaya qayıda bilərlər. Danışıqlar aparmışıq, cavab gözləyirik. Bunun üçün həm də maliyyə imkanlarımızı nəzərdən keçirməliyik. Çempionluğa iddia etmək bir qədər təkəbbürlülük olardı. İlk “altılığ”a rahat düşə bilərik”.
