Futbol üzrə Azərbaycan Kubokunun II təsnifat mərhələsi ölkənin şimal və şimal-qərb bölgələrini təmsil edən iki komanda üçün uğursuz başa çatıb. "Şimal" və "Zaqatala" turnirdə mübarizəni dayandırıblar.
Shimal.News xəbər verir ki, oktyabrın 27-də Şamaxı şəhər stadionunda keçirilən qarşılaşmada Xaçmazı təmsil edən "Şimal" Premyer Liqa klubu "Araz-Naxçıvan"a 0:6 hesabı ilə məğlub olub.
Görüşün ən məhsuldar futbolçusu Ağadadaş Salyanski olub. O, üç qol vuraraq het-trik edib. Digər qolları Rövlan Muradov, Abdulla Rzayev və Ülvi İsgəndərov vurublar.
Digər qarşılaşmada isə I Liqa təmsilçisi "Zaqatala" II Liqada çıxış edən "Marafon"un qonağı olub. Sabirabaddakı "Marafon Arena"da keçirilən görüş meydan sahiblərinin 1:0 hesablı qələbəsi ilə yekunlaşıb.
Matçın yeganə qolunu 59-cu dəqiqədə İlham Allahverdiyev vurub.
Beləliklə, hər iki bölgə təmsilçisi Azərbaycan Kubokunun II təsnifat mərhələsində mübarizəni dayandırıb.
Qeyd edək ki, bölgənin digər təmsilçiləri "Şahdağ Qusar" və Qubanın "Hypers" komandası oktyabrın 28-də kubok oyunlarına çıxacaqlar. "Şahdağ Qusar" MOİK-lə, "Hypers" isə "Şamaxı" ilə üz-üzə gələcək.
