"Səbail" komandanın sabiq kapitanı Rahid Əmirquliyevi yenidən heyətinə cəlb edib.
Klubun yaydığı məlumata görə, tərəflər arasında 1+1 illik müqavilə imzalanıb.
Qeyd edək ki, Rahid Əmirquliyev 2018-2023-cü illərdə "Səbail"in formasını geyinib və komandanın kapitanı kimi çıxış edib. Təcrübəli yarımmüdafiəçi həmin dövrdə klubun uğurlarında mühüm rol oynayıb.
Karyerası ərzində Azərbaycan çempionatlarında 451 oyuna çıxan futbolçu "Səbail"in heyətində 120 rəsmi qarşılaşmada meydana çıxıb.
Rahid Əmirquliyev həmçinin klubun tarixində Azərbaycan Premyer Liqasında 100 oyun keçirən ilk futbolçu kimi tarixə düşüb. O, bu göstəriciyə 2022-ci il dekabrın 5-də "Qəbələ" ilə keçirilən çempionat matçında nail olub.
