Qusar rayonunda 16 yaşadək yeniyetmələr arasında Respublika Şahmat Olimpiadasının açılış mərasimi keçirilib.
Shimal.News xəbər verir ki, tədbir iştirakçıları əvvəlcə Ümummilli Lider Heydər Əliyevin abidəsini ziyarət edərək xatirəsini ehtiramla yad ediblər.
Açılış mərasimində çıxış edən Qusar Rayon İcra Hakimiyyətinin başçısı Sahir Məmmədxanov qonaqları və yarış iştirakçılarını salamlayaraq onlara uğurlar arzulayıb. O bildirib ki, qarşıdakı doqquz gün ərzində Qusar şahmat bayramına ev sahibliyi edəcək.
Azərbaycan Şahmat Federasiyasının birinci vitse-prezidenti Faiq Həsənov isə çıxışında qeyd edib ki, dünya şöhrətli şahmatçıların böyük əksəriyyəti məhz belə kütləvi yarışlardan başlayaraq təcrübə qazanıb və peşəkar idmançı kimi formalaşıb. Onun sözlərinə görə, Qusarda keçirilən olimpiada da gənc şahmatçıların yaddaşında yaddaqalan idman bayramı kimi qalacaq.
Yarışın baş hakimi Azər İbrahimov olimpiadanın keçirilmə qaydaları barədə məlumat verib. Bildirilib ki, avqustun 3-dən 11-dək davam edəcək yarış A və B qrupları üzrə 11 turdan ibarət olacaq.
A qrupunda 2010-2015-ci il təvəllüdlü (11-16 yaş), B qrupunda isə 2016-cı il və daha sonrakı təvəllüdlü (10 yaş və daha kiçik) şahmatçılar mübarizə aparacaqlar. Olimpiadada respublikanın müxtəlif bölgələrindən gələn yeniyetmə şahmatçılar iştirak edirlər.
