Quba rayonunun Gəray kəndində elektrik təchizatı ilə bağlı ciddi təhlükə yaranıb. Sakinlər kənd ərazisindəki elektrik dirəyinin və naqillərin qəzalı vəziyyətdə olmasından şikayətçidirlər.
Shimal.News-a danışan sakinlərin sözlərinə görə, yüksək gərginlikli elektrik xəttinin daşıyıcısı olan taxta dirək tamamilə çürüyüb və yararsız hala düşüb. Eyni zamanda, elektrik naqillərinin də çürüməsi və qoparaq yerə düşməsi hər an faciə baş verə biləcəyindən xəbər verir.
Qəzalı vəziyyətdə olan dirəyin yaşayış evlərinə çox yaxın məsafədə yerləşməsi təhlükəni daha da artırır.
"Dəfələrlə aidiyyəti qurumlara müraciət etmişik, deyirlər düzəldəcəyik. Lakin hələ də baxan yoxdur", - deyə sakinlər narazılıqlarını ifadə ediblər.
Vətəndaşlar aidiyyəti qurumlardan kəndə baxış keçirilməsini, qəzalı dirək və naqillərin yenisi ilə əvəz olunmasını tələb edirlər.
