Xaçmaz rayonunda kütləvi qida zəhərlənməsi hadisəsi baş verib.
Hadisə iyulun 10-da saat 22:00 radələrində Xaçmaz şəhərinin Heydər Əliyev prospektində yerləşən "Kamran" şadlıq evində qeydə alınıb.
Məlumata görə, saat 17:00-dan etibarən keçirilən əsgər yola salma məclisində iştirak edən 21 nəfərin bir müddət sonra vəziyyəti pisləşib. Zəhərlənmə əlamətləri müşahidə olunan şəxslər saat 23:06-da təcili tibbi yardım briqadalarının köməyi ilə Xaçmaz Rayon Mərkəzi Xəstəxanasına çatdırılıblar.
Xəstəxanada onlara dərhal ilkin tibbi yardım göstərilib. Son məlumata əsasən, zərərçəkənlərin vəziyyəti qənaətbəxş qiymətləndirildiyi üçün 21 nəfərin hamısı ambulator müalicə üçün evə buraxılıb.
Faktla bağlı aidiyyəti dövlət qurumları tərəfindən araşdırma aparılır. Zəhərlənmənin səbəbi və qida nümunələri üzrə ekspertizanın nəticələri araşdırmanın yekununda məlum olacaq.
Mənbə: Bizim.Media
