Paytaxtda qəbiristanlıqdan oğurlanan gülləri satan şəxs həbs olunub.
Lent.az-ın məlumatına görə, hadisə "İnşaatçılar" metrostansiyasının qarşısında qeydə alınıb. Burada gül satan 41 yaşlı Şamil İsayevə polis əməkdaşları yaxınlaşaraq satdığı güllərin qəbiristanlıqdan oğurlandığını bildiriblər və onu ifadə verməyə dəvət ediblər.
Lakin Şamil İsayev polisin qanuni tələbinə tabe olmayaraq etiraz edib. Bu səbəbdən o saxlanılıb və barəsində inzibati protokollar tərtib olunub.
Onun ifadəsinə görə, gülləri tanımadığı bir şəxsdən ucuz qiymətə alıb.
Araşdırma zamanı məlum olub ki, zərərçəkən şəxs qardaşının məzarından güllərin oğurlanması ilə bağlı polisə müraciət edib. Əməliyyat-axtarış tədbirləri nəticəsində oğurluğu törədən 23 yaşlı Quba rayon sakini saxlanılıb.
O, ifadəsində gülləri Şamil İsayevə satdığını etiraf edib.
Məhkəmənin qərarı ilə Şamil İsayev 15 sutka müddətinə inzibati qaydada həbs edilib.
