Tanınmış meyxana ustası Namiq Məna Quba rayonunda yağan qar səbəbilə qızının ailəsi ilə birlikdə qəzaya düşməsi barədə hadisənin təfərrüatlarını açıqlayıb.
N.Məna deyib ki, yayılan xəbərlər şişirdilməyib və doğrudur.
Onun sözlərinə görə, təbiət hadisəsindən heç kim sığortalanmayıb:
"Şıltaq qış ayı özünü büruzə verir. Quba dağlarında qış sərt keçir. Hadisə olan vaxt mənfi beş-altı dərəcə şaxta olub. Qızım ailəsi ilə birlikdə avtomobildə gedərkən maşın yerində iki-üç dəfə fırlanıb və dərəyə doğru yuvarlanıb. Bunu sürücü məsuliyyətsizliyi, səriştəsizliyi və səhlənkarlığı kimi dəyərləndirirəm. Sürücü kürəkənim olub. Quba yolları ona bir qədər yaddır. Bir müddət Rusiyada yaşayıb. Oranın buzlu, şaxtalı yolları ilə bizim yollar arasında ciddi fərq var. Düşünüb ki, sürmək olar. Həmin yolda sərt döngələr mövcuddur. Hadisə axşam saat 19:00–20:00 radələrində baş verib. Bu saatlar artıq havanın daha da soyuduğu vaxtdır. Buz qatı sərtləşir. Kürəkənimdə özünə arxayınlıq olub ki, sərt döngələrdə manevr edə bilər. Nəticə isə belə olub.
Şükür Allaha, ciddi xəsarət alan olmayıb. Maşın dərəyə yuvarlananda təkər gicitkən kollarına ilişib və partlayıb, nəticədə dayanıb. Yoxsa yuvarlanaraq dərədən aşar, ciddi fəsad törədə bilərdi. Allahın hər anına şükürlər olsun, yəqin ki, məsləhət belə imiş. Sarsıntı keçiriblər, amma təkrar edirəm, ciddi xəsarət almayıblar.
Nəvəmin 12 yaşı var. Sanki hadisə olacağını əvvəlcədən duyub. Planşetlə hadisəni çəkib. Deyirəm ki, niyə sona qədər çəkməmisən? Həmin vaxt onu bir az güldürdüm. Dedi ki, "Baba, planşet əlimdən yerə düşdü, yoxsa sona qədər çəkəcəkdim". Soruşdum ki, qorxmamısan? Dedi ki, yox. Bildirdim ki, qorxmaq lazım deyil, hadisədən heç kim sığortalanmayıb.
Həmin an maşının içində sıxışıb qalmışdılar. Ürək-dirək verirdim. Belə ciddi hadisələrdə hər zaman soyuqqanlı olmağa çalışıram, amma inanın, bir neçə gün keçəndən sonra görüntülərə yenidən baxıram və indi daha çox təsir edir. Doğrudan da, böyük bəladan qurtarıblar.
Qonaqpərvər, cəsarətli Quba camaatına təşəkkürümü bildirirəm. Hadisə zamanı dərhal kənd camaatı öz dəstəyini göstərdi. Təvazökarlıqdan uzaq olaraq demək istəyirəm ki, mənim övladım olduğunu bildikdə çox səmimi və isti münasibət göstərərək kömək etdilər.
Ümumiyyətlə, son iki-üç gündür telefonum susmur, zənglər səngimir. Xalqımıza minnətdarlığımı bildirir, bayramlarını təbrik edirəm. Bu sevgiyə görə sonsuz təşəkkür edirəm. Xalqımızın nə qədər diqqətcil olduğunu bir daha gördüm. Tanıdığım və tanımadığım insanlar zəng etdilər".
(Pravda.az)
