Gəndob–Xaçmaz–Yalama avtomobil yolunda iri daşların və digər sərt maneələrin düzülməsi sürücüyə ciddi ziyan vurub.
Hadisə barədə Shimal.News-a müraciət edən sürücünün sözlərinə görə, qəza sentyabrın 24-də gecə saatlarında Xaçmaz rayonunun Müşkür kəndi ərazisindən keçən hissəsində baş verib. O, "Mercedes" markalı avtomobillə Xaçmaz dairəsindən Xudat istiqamətində hərəkətdə olarkən qəfil qarşısına daş parçaları, şifer qırıqları və odun parçaları düzüldüyünü görüb.
Sürücü bildirir ki, toqquşmadan sonra avtomobilin idarəetməsini itirib və nəqliyyat vasitəsi iki dəfə fırlanaraq asfalt örtüyündən çıxıb. Onun sözlərinə görə, avtomobilə təxminən 500 manat ziyan dəyib.
Hadisədən sonra sürücü aidiyyəti qurumun qaynar xəttinə məlumat verib. Əraziyə cəlb olunan əməkdaşlar burada görüntü kamerasının olmadığını və maneələri kimin yerləşdirdiyini müəyyənləşdirməyin çətin olduğunu bildiriblər.
Sürücü avtomobilinə dəyən zərərin kim tərəfindən qarşılanacağı ilə bağlı da cavab ala bilmədiyini deyir. O, yola maneələrin kimin tərəfindən və hansı məqsədlə qoyulduğunun araşdırılmasını, hadisənin ictimailəşdirilməsini və məsul şəxslərin müəyyənləşdirilməsini xahiş edir.
