Qayınatasının evində yaşayan kişi həyat yoldaşını döyüb.
Hadisə Sumqayıt şəhərinin Xəzər bağları yaşayış massivində baş verib.
Ağsu rayon sakini, 1996-cı il təvəllüdlü Murad Zamanov (ad və soyad şərtidir) 2021-ci ildə Vəsilə ilə ailə həyatı qurub. Onların qalmağa yerləri olmadığından cütlük Vəsilənin valideynləri ilə birlikdə yaşamağa başlayıb. Nikahdan iki övladları dünyaya gəlib.
Son günlər Muradın evə mütəmadi olaraq sərxoş vəziyyətdə gəlməsi ailədə mübahisələrə səbəb olub.
Bir neçə gün əvvəl Murad gecə saatlarında yenidən sərxoş vəziyyətdə evə gəlib. Həyat yoldaşı ona irad bildirdikdən sonra aralarında mübahisə yaranıb. Bu zaman Murad evin foyesində qayınatasına məxsus çəliyi götürərək həyat yoldaşına zərbələr endirib.
Hadisə nəticəsində qadın xəsarət alıb. Səs-küyə valideynləri gəlib və Muradı evdən çıxarıblar.
Faktla bağlı cinayət işi başlanılıb. Polis əməkdaşlarının keçirdikləri tədbirlər nəticəsində M. Zamanov saxlanılaraq istintaqa təhvil verilib.
Cinayət işi üzrə istintaq yekunlaşdırılaraq materiallar Sumqayıt Şəhər Məhkəməsinə göndərilib. Məhkəmə istintaqı zamanı ər-arvad barışdığından cinayət işinə xitam verilib.
Mənbə: Oxu.аz
