Ağsuda polisə yalan məlumat verən şəxs həbs edilib.
Hadisə Ağsu şəhəri, Nizami küçəsi 12 ünvanında baş verib.
Rayon sakini, 1982-ci il təvəllüdlü Sərxan Məmmədov (ad və soyad şərtidir) əvvəllər məhkum olunub və 2022-ci ildə cəzasını başa vurduqdan sonra azadlığa buraxılıb.
O, bir neçə gün əvvəl evində spirtli içki qəbul edib. Spirtli içkinin təsiri altında olarkən Daxili İşlər Nazirliyinin (DİN) 102 Xidməti Zəng Mərkəzinə zəng edərək bildirib ki, 2022-ci ildə həbsdən azad olunsa da, məşğulluq xidməti tərəfindən işlə təmin edilməyib. Bu səbəbdən Ağsu dolaylarını bağlayacağını və həmin yola partlayıcı maddə (bomba) yerləşdirəcəyini deyib. Daha sonra mobil telefonunu söndürərək yaşadığı evin qapısını bağlayıb.
DİN-in 102 Xidməti Zəng Mərkəzinə daxil olan müraciətlə bağlı polis əməkdaşları həmin ünvana gəlsələr də, o, qapını açmayıb və izahat verməkdən imtina edib. Daha sonra polis əməkdaşları onu rayon polis şöbəsinə aparıblar.
Hadisə ilə bağlı inzibati protokol tərtib olunaraq iş məhkəməyə göndərilib. Ağsu Rayon Məhkəməsinin qərarı ilə S.Məmmədov 15 sutka müddətinə inzibati qaydada həbs edilib.
Mənbə: Oxu.az
