Zal Zalov 1915-ci ildə Qusar rayonunun Cibir kəndində anadan olub.
O, Cibir kəndində təhsil alandan sonra Qusar Pedaqoji Məktəbini bitirib. Zal 1933-cü ildən Piral kənd məktəbində müəllimliyə başlamışdır. Daha sonra o, 1934-cü ildə Qusarın Yuxarı Zeyxur ibtidai məktəbinə müdir təyin edilmiş, 1936-1938-ci illərdə isə V.İ.Lenin adına ikiillik APİ-nin (indiki Azərbaycan Dövlət Pedaqoji Universiteti) kimya-biologiya fakültəsində təhsil almışdır.
Zal 1938-ci ildə Qusarın Həzrə kənd orta məktəbinə müəllim, 1941-ci ildə Cibir kənd orta məktəbinə direktor təyin edilib.
O, 1941-ci ildə Böyük Vətən müharibəsi başlayanda ordu sıralarına çağırılmış, 1942-ci ildə müharibədə yaralanaraq ordudan tərxis olunmuşdur. Daha sonra o, Qusara geri dönmüşdür. 1942-ci ildə Cibir kənd məktəbinə, 1944-cü ildə Yasab kənd orta məktəbinə, 1944-cü ildə Düztahir kənd orta məktəbinə, 1952-ci ildə Həzrə kənd orta məktəbinə direktor vəzifəsinə təyin edilmişdir.
1960-cı ildə öz xahişi ilə Cibir kəndindəki səkkizillik məktəbə direktor təyin olunmuş, qısa müddət ərzində kənd camaatının köməyi ilə yeni məktəb binasını tikdirərək, kənddə orta məktəbin açılmasına nail olmuşdur.
Zal 47 il ərzində Qusarın Həzrə, Düztahir, Yuxarı Zeyxur və Cibir kənd məktəblərində çalışmışdır. Həmçinin o, Cibir kəndində yeni məktəb, klub və başqa binaların tikilməsinin təşəbbüskarı olmuşdur.
Zal Zalov “Qabaqcıl maarif xadimi” nişanı, “Əməkdar fərqlənməyə görə” medalı ilə təltif edilmiş, 1978-ci ildə isə ona Azərbaycan Respublikasının “Əməkdar müəllimi” adı verilmişdir.
O, Xalq şairi Səməd Vurğunla dostlu idi.
Zal Zalov 1996-cı ildə vəfat edib.
İstinad edilən mənbələr:
