Şamil təpəsi (Şamilapel) adlı qədim yaşayış yeri Qusar rayon mərkəzindən 10-15 km aralıda, Gədəzeyxur kəndinin şimal-şərq hissəsində yerləşir. Təpənin hündürlüyü 15 metr təşkil edir.
Buradan tapılmış əl dəyirmanı və məişət əşyaları Şamil təpəsində IV-VI əsrlərdə yaşayışın olmasını sübut edir.
1970-ci ildə burada kəşfiyyat xarakterli qazıntı işləri aparılmışdır. 1978-1981-ci illərdə isə qusarlı alim Abidulla Orucovun rəhbərliyi ilə işlər davam etdirilmişdir. Bu yaşayış yerindən XVII-XIX əsrlərə aid bina qalıqları tapılmışdır.
Həmçinin yaşayış yerindən çoxlu miqdarda müxtəlif forma və həcmli təsərrüfat quyuları, divar qalıqları, müxtəlif gil qab qırıqları, daş alətlər, xüsusilə uzunsov qayıqvari dən daşları aşkar edilmişdir. Burada içərisi palçıqla suvanmış iki metrlik təsərrüfat quyuları tapılmışdır. Həmin quyular uzunmüddətli taxıl saxlamaq üçün istifadə edilmişdir.
Aparılmış arxeoloji tədqiqat işləri nəticəsində məlum olmuşdur ki, yaşayış yerinin kənarları sənətkarlıq, mərkəzi isə yaşayış sahəsi olub.
Şamil təpəsi yerli əhəmiyyətli arxeoloji tarixi abidə hesab edilir.
İstinad edilən mənbələr:
Abdulla Orucov. Şimal-şərqi Azərbaycan ilk orta əsrlərdə. Bakı-2018.
