Cibir kəndi Qusar rayonunun şimal-qərbində, Piral inzibati ərazisində, dağətəyi düzənlikdə yerləşir.
Bəzi məlumatlara görə, kənd Dağıstanın (Rusiya) Axtı rayonundakı Çeper (Caba) kəndindən köçmüş ailələrin məskunlaşması nəticəsində yaranmışdır. Sakinlər yeni yaşayış məntəqəsinə öz köhnə adını vermişlər. Digər məlumatlara görə, yerli əhali kəndə “Cibir” - “Чи пIиp” (ləzgi dilindən “bizim pirimiz”) adını veriblər.
Kənd indiki yerində təxminən 400 il əvvəl salınmışdır. Ehtimal olunur ki, Cibir kəndi dörd dəfə yerini dəyişmişdir. Əhalinin tez-tez köçmə məcburiyyəti düşmənlərin hücumları və təbii fəlakətlərin baş verməsi ilə əlaqəli idi.
XVIII əsrdə Cibir Quba əyalətinin böyük kəndlərindən idi və burada kənd təsərrüfatını inkişaf etdirməkdən ötrü əlverişli şərait var idi. Dərbəndə gedən dəvə karvanları buradan keçirdi. Həmin yol indi də “Dəvə yolu” adlanır.
1885-1903-cü illərdə burada dünyəvi məktəb fəaliyyət göstərmişdir. 1929-1930-cu illərdə isə bu kənddə kolxozlar (kollektiv təsərrüfatlar) yaradılmışdır.
Kənd qədimdən öz bağları və zəmiləri ilə məşhur olmuşdur. Sovet dövrünün ilk illərində burada 2000 hektara yaxın taxıl zəmisi var idi. Burada başqa alma növləri ilə bərabər, “Cibir alması” və 50-dən çox armud növü becərilir. Həmçinin hər bağda armud qurutmaq üçün xüsusi təndirlər var idi.
Kəndin məşhur nəsilləri Abdullahlar, Hesenar, Bardiyar, Kullarar, Teverar, Exterar sayılır. Əhali, əsasən, heyvandarlıq, əkinçilik, bağçılıq və bostançılıqla məşğul olur.
1915-ci ildə olan “Qafqaz təqvimi”ndə əhalinin siyahıyaalınması məlumatına əsasən, Cibir kəndində 1299 nəfər yaşayırdı. 2018-ci ildə əhalinin sayı 1300 nəfər olub.
İstinad edilən mənbələr:
