Qusarın Kuzun bələdiyyəsinin sədrinə iki il ərzində üçüncü dəfə hökm oxunub.
“Qafqazinfo”nun əldə etdiyi məlumata görə, 55 yaşlı sabiq məmur Yaşar Kiçikbəyov bu ilin əvvəlində dələduzluğa görə 3 il azadlıqdan məhrum edilmişdir. Məhkəməsi davam etdiyi müddətdə onun korrupsiya cinayətlərinin də üstü açılıb. O, Baş Prokuror yanında Korrupsiyaya qarşı Mübarizə Baş İdarəsi tərəfindən cinayət məsuliyyətinə cəlb olunub.
İttihama görə, Kiçikbəyov bələdiyyə torpaqlarını fermerlərdən və digər şəxslərdən rüşvət alaraq uzunmüddətli icarəyə verib. O, bələdiyyənin hüquqlarına və qanunla qorunan mənafelərinə mühüm zərər vuraraq vəzifə səlahiyyətlərini aşıb, vəzifəli şəxs kimi vahid tamah niyyəti ilə rəsmi sənədə bilə-bilə yalan məlumatlar daxil edib.
Sumqayıt Ağır Cinayətlər Məhkəməsində eks-bələdiyyə sədrinin təqsiri sübuta yetirilib. Hökmə əsasən, ona əvvəlki cəzası toplanmaqla 9 il azadlıqdan məhrumetmə cəzası verilib.
Müttəhim Kiçikbəyov ilk dəfə 2022-ci ildə həbs edilib. Həmin vaxt ona 2 il 6 ay həbs cəzası verilmişdir. Sonrakı hökmlə ümumi cəza müddəti 3 ilə qaldırılıb. Bu, onun 2 il ərzində üçüncü hökmüdür.
