Avqustun 2-si Azərbaycan Kinosu Günüdür. Bununla bağlı sizə Qusarda lentə alınan “Mahnı belə yaranır” filmi haqqında məlumat veririk:
“Mahnı belə yaranır” kinopovesti 1950-ci ildə C.Cabbarlı adına “Azərbaycanfilm” kinostudiyası tərəfindən Qusarda, Bakıda və Mahaçqalada çəkilib.
Film XX əsrin məşhur Dağıstan şairi, xalq aşığı Süleyman Stalskinin (Həsənbəyov) həyatı, yaradıcılığı və ictimai fəaliyyətindən bəhs edir.
Bioqrafik dramın təsdiqi çox vaxt apardığı üçün film tamaşaçılara 1957-ci ildə Moskvada təqdim olunub. Ədəbi ssenari qəbul olunsa da, müzakirələr nəticəsində bir neçə dəyişikliklər edilmişdir.
Filmin rejissoru Rza Təhmasib və Mikayıl Mikayılovdur. Mikayıl Mikayılov, həmçinin filmdə Biçexarov rolunda çəkilmişdir. Ekran əsərinin ssenari müəllifi yazıçı və kinodramaturq Roman Fatuyevdir. Rollarda Konstantin Slanov (Süleyman Stalski), Vladimir Txapsayev (Qara Maqoma), Afanasi Koçetkov (Maksim Qorki), Məmmədəli Vəlixanov (Bədirxan), Atamoğlan Rzayev (Xanapi) və digərləri olublar.
Ləzgi şairi Süleyman Stalski Dağıstanın Aşağı Stal kəndində 1869-cu ildə anadan olub. Şair şeirlərini ləzgi və Azərbaycan dillərində yazıb. 1934-cü ildə Süleyman Stalskiyə Xalq şairi adı verilir və onun ilk “Seçilmiş əsərləri” çapdan çıxır. O, “Lenin” ordeninə layiq görülüb. Şair 1937-ci ildə Dərbənd seçiciləri tərəfindən SSRİ Ali Sovetinə deputatlığa namizədliyi irəli sürülür. Süleyman Stalski 1937-ci ildə vəfat edib və Mahaçqalada dəfn olunub.
İstinad edilən mənbələr:
