Kübra Yəhya qızı Fərəcova 16 may 1907-ci ildə Qubada anadan olub.
Fərəcova əvvəl ibtidai rus-tatar məktəbini, sonra isə birillik Tağıyev Qadın Gimnaziyasını bitirib.
Kübra xanım 1924-cü ildə Göyçaya köçüb. İki il burada və Ağdaş rayonunda müəllimlik edib. Lakin o, burada çox qalmayıb. Fərəcova 1926-cı ildə Qazax rayonunda məskunlaşıb və orada uşaq bağçasında tərbiyəçilik edib. Kübra xanım 1929-1933-cü illərdə indiki Azərbaycan Tibb Universitetində oxuyub.
O, 1931-1979-cu illərdə Azərbaycan SSR Xalq Səhiyyə komissarının müavini, Azərbaycan SSR Səhiyyə naziri, Azərbaycan SSR Ali Soveti Rəyasət heyətinin katibi və başqa vəzifələrdə işləyib.
Kübra xanım həmin vaxt Kürdəmirdə olarkən, orada qız məktəbini təşkil edib və müəllim kimi çalışıb. O, bu məktəbə 50-yə qədər qız cəlb edib. Kübra xanıma Kürdəmirdə “Qadın savadsızlığına qarşı mübariz öndərlərdən biri” deyirdilər.
Kübra xanım SSRİ Ali Sovetinin və Azərbaycan SSR Ali Sovetinin deputatı olmuşdur.
1960-cı ildə Fərəcova Sovet pediatrı və Azərbaycan SSR-in Əməkdar həkimi adlarına layiq görülüb. O, həmçinin “Qırmızı Əmək Bayrağı” və “Şərəf nişanı” ordenləri ilə təltif edilmişdir.
1950-1979-cu illərdə o, indiki Elmi-Tədqiqat Pediatriya İnstitutunun rəhbəri olub.
Kübra xanım, həmçinin Ümumittifaq Pediatriya Cəmiyyətinin Rəyasət Heyətinin üzvü, Respublika Pediatriya üzrə Attestasiya Komissiyasının sədri, pediatriya cəmiyyətinin sədri və digər elmi-ictimai fəaliyyətlə məşğul olub.
1979-cu ildə Fərəcova İttifaq əhəmiyyətli fərdi təqaüdə çıxdı. Lakin həmin vaxt o, indiki Elmi-Tədqiqat Pediatriya İnstitutunda əməkdaşlarına rəyçi, məsləhətçi, elmi rəhbər kimi köməklik göstərirdi.
Kübra Fərəcova 1986-cı (digər mənbələrdə 1988) ildə Bakı şəhərində vəfat edib.
1992-ci ildən Bakı şəhərində yerləşən Elmi-Tədqiqat Pediatriya İnstitutu Kübra Fərəcovanın adını daşıyır.
İstinad edilən mənbələr:
