Qarı hələ tam əriməyib, torpaq nəm, hava isə hələ də sərindir. Amma təbiətin qoynunda bir an təravət hiss edirsən — yarpızın iyi səni dayandırır. Ətrafa yayılan bu qoxu yazın gizli müjdəsidir. Torpağın altından yenicə baş qaldıran, qurumuş yarpaq xəzəlinin altında gizlənən yaşıl cücərtilər, sanki qışın yorğunluğunu aradan götürür.
Shimal.News-a danışan izləyicisi bildirir ki, Qubanın dağətəyi guşələrindən olan Qəçrəşdə yarpızın qoxusu başqadır. Sakin deyir ki, qar əridikdən sonra quru yarpaqları bir az eşələsən, sanki təbiət öz sirrini açır — altda gizlənmiş incə, uzunsov yarpaqlar görünür. Hələ boyu balacadır, amma ətri güclüdür. Elə bu təravət Qəçrəşin yazını tanıdır.
Çiçəkləri göyümtül-çəhrayı rəngdə olan bu bitkini kim tanımır? Lakin yarpız təkcə ətir deyil, həm də şəfadır. Mütəxəssislərin sözlərinə görə, onun tərkibində faydalı yağlar, mentol, azulen, puleson, diosmin, qlükozidlər, saponin şirəsi və şəkərlər var. Bu maddələr həzmi yüngülləşdirir, nəfəsi açır, bədənə təravət verir.
Hələ qarın son ləkələri torpaqda qalsa da, yarpız artıq həyatın davam etdiyini xatırladır. Görməsən də, hiss edirsən — yaz gəlib.
