Barəsində bəhs ediləcək foto 9 il əvvəl adi bir qış günündə Qusarın ucqar Sudur kəndinin inzibati ərazisindəki Yergi Kek yaylağında çəkilib.
Bizim.Media-nın məlumatına görə, görüntünü Vüqar Sevdimalıyev adlı fotoqraf Sudur kəndinə təşkil olunan tur vaxtı çəkib.
Çox təbii və reallığı yerindəcə tutan fotoda kəndli öküzlər qoşulan kirşə ilə heyvanlarına quru ot gətirir. Yanında məktəbli qız və it də gedirlər.
Sudur kəndindən olan şair Bilal Adilov bu barədə paylaşım edib. O bildirilib ki, zəhmətkeş insanı əks etdirən foto Moskvada "Xalqlar dostluğu" sərgisində birinci yeri tutub. Fotonun müəllifi diploma və pul mükafatına layiq görülüb.
Diqqət çəkən foto haqqında araşdırma aparılarkən, yaylaqdan həyətinə mal-qarası üçün quru ot gətirən şəxsin Yergi kek kənd sakini Bəhruz Novruzbəyov olduğu məlum olub.
Həmin vaxt bütün sakinlər quru otu yaylaq sahələrində saxlayırdılar. Qışda isə gətirib tövlələrinə yığırdılar.
Bunun üçün camaat xüsusi olaraq öküz saxlayırdı, 9 il əvvəl dairə üzrə 33 cüt öküz heyvanı saxlanılırdı, lazım olanda əkinə, biçinə və daşımağa bu heyvanları kirşəyə qoşmaqla istifadə edirdilər.
Öküzləri indi dağ yolları üçün əlverişli olan yük avtomaşınları əvəz edib. O vaxtdan qalan kirşələri isə uşaqlar qışda buz üstündə sürüşmək üçün istifadə edirlər.
