İsmayıllı rayonunda toplanaraq emal olunan təbii sumağın bazarlarda satılan ucuz məhsullardan ciddi fərqləndiyi bildirilir.
Sumaq yığımı və satışı ilə məşğul olan yerli sakinlərin sözlərinə görə, bu bitki toplandıqdan sonra təxminən bir ay qurudulur, daha sonra təmizlənərək satışa çıxarılır. Bu səbəbdən keyfiyyətli sumağın 1 kiloqramı 45–50 manata təklif olunur.
Bununla yanaşı, bazarlarda 12–20 manata satılan sumaqların tərkibi ilə bağlı şübhələr var. Satıcılar etiraf edir ki, bəzi hallarda məhsulun çəkisini və rəngini artırmaq üçün limon duzu və qida boyaları əlavə olunur.
Qida üzrə mütəxəssislər qeyd edir ki, təbii sumaq quru, parıltısız və turş dadlı olur. Saxta məhsulu müəyyən etmək üçün onu suda həll etdikdə rəng verməsi əsas göstəricilərdən biri sayılır.
Mütəxəssislər alıcılara xəbərdarlıq edir ki, sumağı seçərkən yalnız qiymətə deyil, keyfiyyətinə də diqqət yetirmək vacibdir.
