İsmayıllı rayonunun Qarakolluq kəndində anadan olan Tərlan Mirzəliyev uzun illər Azərbaycan kəlağayısının istehsalı və təbliği üzrə fəaliyyət göstərib. Bu haqda ShimalNews 20 avqust tarixində "Respublika"ya istinadən xəbər verir.
Hazırda doğma kəndində fəaliyyətini davam etdirən sahibkar 40 ilə yaxın Türkmənistanda yaşayıb və bu sənətə öz dəyərli töhfəsini verməyə çalışıb. O bildirib ki, xaricdə fabrik açaraq Azərbaycan kəlağayılarının istehsalı ilə məşğul olub. Həmin müəssisədə 300 işçi olub və istehsal ilbəil artırdı.
“Xəstəliyimlə əlaqədar vətənə qayıtmalı oldum. Bundan sonra fabriki burada qurmaq qərarına gəldim. Beləliklə, Basqalda fabrik aldım və dövlətin dəstəyi sayəsində istehsala başladım. Cənab Prezidentin Sərəncamına uyğun olaraq hazırda orada iş gedir və 100-dən çox insan işlə təmin olunacaq. Fabrikdə kəlağayı istehsalı ilə yanaşı, misgərlik, xalçaçılıq, dulusçuluq, muzey və bir çox oyma işləri də olacaq”, - deyə Tərlan Mirzəliyev bildirib.İndi müvəqqəti olaraq Basqal kəlağayı fabriki kənddə yerləşir. Onun istehsal prosesi ilə əyani tanışlıq vaxtı sahibkar bildirib ki, ilk anlardan dövlətdən sifarişlər gəlmişdir. Artıq yerli bazarla yanaşı, Türkiyə, Rusiya, Malayziya, Qazaxıstan, Özbəkistan, İran, Türkmənistan və digər ölkələrə də məhsulumuzu satırıq.
İstifadə etdilən xammala gəldikdə isə o, tam olaraq yerli məhsuldur. Hazırda Şəkidən ancaq ipəyin sapı alınır. Təbii rəngləri almaq üçün otlar, ağaclar və güllər qazanlarda qaynadılır. Qəliblər hər ustanın öz fantaziyası ilə qoz ağacından düzəldilir.
Sahibkar bildirdi ki, bizim fabrik Azərbaycanda ikincidir. O, bəzi sahələr kimi, kəlağayı istehsalının da vergidən azad olmasını istəyir. Çünki bu güzəşt kəlağayı istehsalını xeyli inkişaf etdirər:
“Təkcə onu demək istərdim ki, bir kəlağayının istehsalında 17 proses tələb olunur. Bu mənada dövlət dəstəyinin artırılması çox yaxşı olar. Yaxın gələcəkdə Basqalda bu sahənin inkişafı üçün 300-dən çox yeni iş yeri açılacaq. Çünki bunu evdar qadınlar da bacarırlar. Əvvəllər evlərdə də dəzgah olurdu. Biz Basqal qəsəbəsində birini qurmuşuq, parça toxuyuruq. İndi biz evlərə 100-ə qədər dəzgah qoyub ipəklə də təmin edə bilərik”.
