Qarabağın işğaldan azad edilməsi, təkcə hərbi müstəvidə deyil, həm də milli və mənəvi zəfər kimi tarixə yazıldı. Bu tarixin ən parlaq səhifələrindən biri isə Laçının işğaldan azad edilməsi ilə bağlıdır.
Shimal.News xəbər verir ki, rayonun düşməndən təmizlənməsindən 4 il ötür.
Azərbaycanın füsunkar guşələrindən biri olan Laçın rayonu ölkəmizin cənub-qərbində, Kiçik Qafqazda yerləşir. Rayonun ərazisi şimaldan Kəlbəcər, cənubdan Qubadlı, şərqdən Xocalı, Şuşa və Xocavənd rayonları, qərbdən isə Ermənistanla həmsərhəddir. Rayonun 1 şəhər, 1 qəsəbə, 125 kəndi var. Rayon mərkəzi olan Laçın şəhəri Bakıdan şose yolla 450 km məsafədə yerləşir.
Ümumi sahəsi 1835 kvadrat kilometr olan Laçın rayonu 72 min hektar yaylaq sahəsinə və 34 min hektar zəngin meşə massivinə malikdir. Relyefi dağlıq olan rayonun dəniz səviyyəsindən hündürlüyü 700 metrlə 3 600 metr arasında dəyişir. Ən yüksək dağ zirvəsi Qızılboğazın hündürlüyü 3 594 metrdir. Bol su ehtiyatlarına malik olan rayonun ərazisindən axan Şəlvə və Minkənd çayları birləşərək Həkəri çayını (uzunluğu 113 km) yaradır ki, o da Araz çayına qovuşur.
1992-ci ilin may ayından ermənilərin işğalı altında olan Laçının azad edilməsi Silahlı Qüvvələrin Müzəffər Ali Baş Komandanı, Prezident İlham Əliyevin siyasi liderliyi, sərkərdəlik qabiliyyəti və Azərbaycan Ordusunun Vətən müharibəsindəki uğurlu hərbi əməliyyatları nəticəsində mümkün olub.
Belə ki, Azərbaycan Prezidenti İlham Əliyev, Rusiya Prezidenti Vladimir Putin və Ermənistanın Baş naziri Nikol Paşinyanın 2020-ci il noyabrın 10-da imzaladıqları üçtərəfli bəyanata əsasən Laçın rayonu dekabrın 1-də Azərbaycana qaytarılıb.
Laçın: Bir ənənənin yenidən doğuşu...
Laçın sadəcə bir rayon deyil, bir mədəniyyətin, bir ənənənin, bir həyat tərzinin simvoludur. Laçın əhalisi uzun illər boyunca öz torpağından, öz evlərindən uzaqda yaşayıb, bir gün qayıdacağına inanaraq həsrət içində gözləyib. Bu gün, o əhalinin öz yurdlarına dönməsi, Laçının dirçəlişi ilə birləşərək Azərbaycan xalqının həm keçmişə olan bağlılığını, həm də gələcəyə olan inamını simvolizə edir.
Laçının azad edilməsi regionda yeni bir sülh mühiti qurulması üçün də mühüm bir addım idi. Bu gün Laçın, həmçinin Azərbaycanda və Cənubi Qafqazda uzun müddətli sülhün, əmin-amanlığın və qarşılıqlı anlayışın təmin olunmasına xidmət edən bir nümunə kimi gələcək nəsillərə örnək olacaq.
