Vətən Müharibəsi Qəhrəmanı, Xüsusi Təyinatlı Qüvvələrin qrup komandiri, şəhid Valeh Bədəlovun atası Vahid Bədəlovun əlilliyə görə aldığı pensiya kəsilib.
Bu şikayətlə müraciət edən şəhid anası Südabə Qazıyevanın sözlərinə görə, həyat yoldaşının çoxsaylı xəstəlikləri var və vəziyyəti ağırdır:
"Həyat yoldaşım Vahid Bədəlov 2016-cı ildə Aprel döyüşləri zamanı infarkt keçirdi. Açıq ürək əməliyyatı olundu, ürəyinə stent qoyuldu. Sonra ona II qrup əlillik təyin olundu və beş il pensiya aldı. Əvvəldən şəkər xəstəliyi var idi. 2020-ci ildə isə şəkəri çox ağır vəziyyətə düşdü və ikinci dəfə bu xəstəliyinə görə əlillik təyin edildi.
Yoldaşım beyin qansızması keçirmiş adamdır, mədəaltı vəzi demək olar ki, sıradan çıxıb, işləmir, ayaqları millə yığılıb. 2022-ci ildə onu maşın vurmuşdu. Kəllə-beyin travması alıb. Həm ürəyində stent var, həm də gözlərindən və düz bağırsağından əməliyyat olunub. Çoxsaylı xəstəlikləri var, bu insanın salamat bir yeri yoxdur. Günümüz xəstəxanalarda keçir".
Şəhid anası bildirib ki, bir aydan çoxdur xəstəxanaları gəzsələr də, problemi həll edə bilmirlər:
"Oktyabr ayında növbəti müayinə üçün Zaqatala Rayon Mərkəzi Xəstəxanasına müraciət etdik. Bir aydır xəstəxanaları gəzirik. Maşın tutub Bakıya da aparmışam. Orada bizi endokrinologiya, ürək və baş-beyin travması ilə bağlı üç xəstəxanaya göndərdilər. Hamısından sənədləri toplayıb qayıtdıq. İndi onları sistemə daxil etmək üçün bizi yenidən Şəkiyə göndərirlər. Maşın tuturam, yoldaşım da xəstədir, gedib-gəlirik. Bir aydır yollardayıq. Axırda bizə bildirdilər ki, Zaqatalada sənədlər sistemə daxil edilməlidir, sonra bizə gün təyin olunmalı və Şəkiyə getməliyik.
Dedilər ki, TƏBİB-dən Zaqatala xəstəxanasına göstəriş verilib ki, bu adamın sənədlərini ümumiyyətlə sistemə daxil etməsinlər. Mən tələb edirəm ki, heç olmasa, sənədləri sistemə daxil etsinlər, yoldaşımı əyani komissiyanın qarşısına aparım, orada onun hansı vəziyyətdə olduğunu görsünlər".
Məsələ ilə bağlı TƏBİB-ə sorğu ünvanlanıb.
Qeyd edək ki, şəhid baş leytenant Valeh Bədəlov 2015-ci ildən Xüsusi Təyinatlı Qüvvələrdə xidmət edib, Aprel döyüşlərinin iştirakçısı olub. 2020-ci ildə Vətən müharibəsi zamanı Murovdağ, Cəbrayıl, Xocavənd və Füzulinin azadlığı uğrunda gedən döyüşlərdə iştirak edib. Cəbrayıl döyüşləri zamanı şəhid olub. Zaqatala rayonunun Aşağı Tala kəndində torpağa tapşırılıb.
O, "Vətən uğrunda", "Cəbrayılın azad olunmasına görə", "Kəlbəcərin azad olunmasına görə", "Xocavəndin azad olunmasına görə", "Qubadlının azad olunmasına görə" və "Füzulinin azad olunmasına görə" medallarına, həmçinin ən yüksək fəxri adlardan biri olan "Vətən Müharibəsi Qəhrəmanı" adına layiq görülüb. Valeh Bədəlov ailənin yeganə oğul övladı olub.
Onu da bildirək ki, şəhidin anası Südabə Qazıyeva Zaqatalanın Aşağı Tala kəndindəki 3 nömrəli tam orta məktəbdə ibtidai sinif müəllimi işləyir. O, üç il əvvəl keçirilən sertifikatlaşdırma imtahanında rekord nəticə göstərib. Südabə Qazıyeva 67 dəqiqə ərzində mümkün 60 baldan 59 bal toplayıb.
Mənbə: Qafqazinfo.аz
