İsmayıllı rayonunun Lahıc qəsəbəsi qədim sənətkarlıq ənənələri və tarixi memarlığı ilə turistlərin diqqətini cəlb edən məkanlardan biridir.
"Xəzər Xəbər"in məlumatına görə, daş döşənmiş küçələri və əsrlərin izini qoruyan evləri ilə tanınan qəsəbə bu gün də özünəməxsus ruhunu saxlayır.
Sakinlərinin sözlərinə görə, Lahıcda əhalinin əsas gəlir mənbəyi hazırladıqları əl işlərinin və kənd təsərrüfatı məhsullarının satışıdır. Burada xüsusilə misgərlik sənəti geniş yayılıb. Ustalar əsrlərdir davam edən ənənəni qoruyaraq mis qablar, bəzək əşyaları və müxtəlif suvenirlər hazırlayırlar.
Lahıc həm də xalçaçılıq, papaqçılıq və digər milli sənətkarlıq nümunələri ilə məşhurdur. Bu sənətlər nəsildən-nəslə ötürülərək bu günə qədər yaşadılıb.
Qəsəbəyə gələn turistlər yalnız sənətkarlıq nümunələri ilə deyil, həm də yerli mətbəxlə tanış olurlar. Qutab, kabab, plov və xüsusilə Lahıc halvası qonaqların ən çox seçdiyi yeməklər sırasındadır.
Turizm obyektlərinin nümayəndələri bildirirlər ki, hər il minlərlə yerli və xarici turist Lahıca səfər edir. Qonaqlar burada həm qədim sənətkarlıq ənənələrini yaxından görür, həm də dağ mənzərəsinin gözəlliyindən zövq alırlar.
Beləliklə, Lahıc qəsəbəsi Azərbaycanın qədim sənətkarlıq və milli mədəniyyətinin canlı nümunəsi kimi öz əhəmiyyətini qorumaqda davam edir.
