Qubanın Qırmızı qəsəbəsində yaşayan dağ yəhudilərinin ənənəvi mərasimlərindən biri “Bar miçva”dır.
Bu xüsusi mərasim oğlan uşağının 13 yaşında yetkinlik dövrünə çatması ilə bağlı keçirilir. Hesab edilir ki, bu yaşdan sonra oğlan artıq öz müqəddəratını özü həll etməli, müstəqil həyatını qurmalıdır, məsuliyyətli olmalıdır.
İnanca görə, bu vaxta qədər uşağın tərbiyəsi və elədiyi əməllərə görə məsuliyyəti onun valideynləri daşıyıb. Buna görə də “Bar miçva” günü ata belə deyib, xeyir-duasını verir: “Məni övladıma görə əzabdan qurtarana şükürlər olsun”.
Bunu deməklə valideyn ona tərbiyə verməsinin nəticəsi haqqında “hesabat” verir, övladını sanki bu bayramda bütün xalqı təmsil edən cəmiyyətə ötürür. Beləliklə, uşaq cəmiyyətin tamhüquqlu üzvü hesab edilir.
Mərasim həmin uşağın 9 kişi ilə bərabər sinaqoqda dua oxuması ilə başlanır. Burada Tövratdan ayələr oxuyur, ibadət edirlər. Dualara “amin” deyən kişilərin sayı 10-dan az olmamalıdır. İnanca görə, “amin” deyənlərin sayı 10 nəfərdən az olarsa, dualar qəbul olunmaz.
Sinaqoqda ibadət bitəndən sonra qonaqlar evə keçib, şənliyi orada davam edirlər. “Bar miçva”nı qeyd edənlərə, adətən, hədiyyələr verilir. Əgər hədiyyə olaraq pul verilirsə, onu, adətən, xeyriyyə məqsədləri üçün xərcləyirlər.
İstinad edilən mənbələr:
