Qələmşah İdrisov 18 iyun 1964-cü ildə Xaçmaz rayonunun Qıraqlı kəndində anadan olub.
İdrisov orta məktəbi bitirdikdən sonra, 1982-ci ildə Azərbaycan Dövlət Pedaqoji Universitetinin bədii qrafika fakültəsinə qəbul olunub. O, 1983-1985-ci illərdə Rusiya Federasiyasının Xabarovsk vilayətində hərbi xidmətdə olarkən Baykal-Amur Magistralının tikintisində tərtibçi rəssam işləmiş və uğurlu yaradıcı fəaliyyətinə görə RSFSR Ali Soveti tərəfindən medalla təltif edilmişdir.
Qələmşah İdrisov 1988-ci ildə Sankt-Peterburq Rəssamlıq Akademiyasında və Ermitajda təsviri sənət nəzəriyyəsi üzrə kurslardan keçmişdir. O, 1989-cu ildə əmək fəaliyyətinə Xaçmazın Qıraqlı kənd tam orta məktəbində başlamışdır.
İdrisov 1992-1993-cü illərdə Ə.Hüseynzadə adına Azərbaycan Dövlət İncəsənət Universitetinin Quba filialında müəllim kimi çalışmağa başlamışdır. O, 2000-ci ildən indiki Azərbaycan Dövlət Pedaqoji Universitetinin Quba filialında müəllim, metodist, kafedra müdiri, direktor müavini kimi çalışmışdır.
Qələmşah İdrisov 2007-ci ildə Bakı Dövlət Universitetinin filologiya üzrə Müdafiə Şurasında namizədlik dissertasiyasını müdafiə edərək filologiya üzrə fəlsəfə doktoru dərəcəsini almışdır. O, 2014-cü ildən Azərbaycan Müəllimlər İnstitutunun Quba filialında Pedaqoji fakültənin dekanı kimi fəaliyyət göstərir.
İdrisov 10 elmi əsərin, 50-dən çox elmi-metodik, publisistik məqalələrin, 7 kitabın müəllifidir. Onun respublikanın müxtəlif qəzet və jurnallarında 100-dən çox elmi, metodiki, publisistik məqalələri işıq üzü görüb. O, “Ürəyimi açıram”, “Qıraqlı toponimi və qıraqlılar”, “Azərbaycan dilində təsviri sənət terminləri”, “Yurd sevgisi”, “Professor Qəzənfər Kazımov və Azərbaycan dilçiliyi”, Xaçmaz rayonunun 80 illiyinə ithaf etdiyi “Xaçmaz toponimləri”, “Toponimika”, “Zəfər çələngi” adlı kitabların müəllifidir.
Qələmşah İdrisov Qubada fəaliyyət göstərən “Gülüstan” elmi-ədəbi məclisinin və Azərbaycan Jurnalistlər Birliyinin üzvüdür. O, “Qızıl qələm”, “Səməd Vurğun”, “Araz” ədəbi mükafatlarına layiq görülüb.
İstinad edilən mənbələr:
