Xaçmaz şəhərinin Nəriman Nərimanov küçəsi, 80 saylı çoxmənzilli binada dam örtüyünün yenilənməsi ilə bağlı aparılan işlər sakinlərdən birinin mənzilində problemə səbəb olub.
Shimal.News-a danışan sakin bildirib ki, dam örtüyü söküldükdən sonra binanın üzəri müvəqqəti olaraq köhnə materiallarla örtülüb. Yağan yağış nəticəsində isə su dam örtüyündən keçərək mənzilə dolub.
Onun sözlərinə görə, yağış suları mənzilin tavanından və işıqlandırma hissəsindən axaraq evə yayılıb. Sakin bu vəziyyətin həm mənzilə, həm də evdəki əşyalara zərər vurduğunu bildirib.
Sakin iddia edir ki, yaranmış vəziyyətlə bağlı damın yenilənməsi işlərini həyata keçirən şəxslə əlaqə saxlayıb. Onun sözlərinə görə, şikayətinə cavab olaraq yağışın yağması əsas gətirilib və məsul şəxs problemi aradan qaldırmaq əvəzinə "Allahın işidir" deyib.
Sakin hesab edir ki, dam örtüyünün yenilənməsi zamanı mənzillərin yağış sularından qorunması təmin edilməli idi. O, işlərin düzgün aparılmaması səbəbindən yağış zamanı evinin içərisinə su dolduğunu və nəticədə özü üçün əlavə problem yarandığını deyir.
Qeyd edək ki, Xaçmaz şəhər inzibati ərazi dairəsi (İƏD) bir neçə gün əvvəl şəhərin Rəsulbəyov, Nəriman Nərimanov və Nəsimi küçələrində yerləşən çoxmənzilli yaşayış binalarında əsaslı təmir və abadlıq işlərinin mərhələli şəkildə davam etdirildiyini açıqlayıb.
Beləliklə, dam örtüyünün yenilənməsinə hazırlıq işləri aparılan 80 saylı binada yağışlı hava zamanı sakinlərdən birinin mənzilinə su dolur.
Məsələ ilə bağlı aidiyyəti qurumlarla əlaqə saxlamağa çalışsaq da, zənglərimiz cavabsız qaldı.
