Bir müddət əvvəl Shimal.News-a müraciət edən Xaçmaz rayonunun Ağtala kənd sakinləri yollarının bərbad vəziyyətə salınması ilə bağlı məsələni gündəmə gətiriblər.
Onların bildirdiyinə görə, Qusarçay yatağından 80-dən çox "KamAZ" yük avtomobili ilə qum-çınqıl daşınıb. Nəticədə kəndlilərin şəxsi vəsaitləri hesabına təmir etdikləri yol, eləcə də ətraf küçələr əsaslı şəkildə zərər görüb.
Ağtala camaatı aidiyyəti qurumlardan problemin aradan qaldırılması üçün təcili tədbirlər görülməsini tələb edib. Eyni zamanda Ekologiya və Təbii Sərvətlər Nazirliyindən çınqıl hasilatının qanuniliyinin araşdırılmasını və verilən vədlərin yerinə yetirilməsini istəyiblər.
Nazirlik tərəfindən aparılan araşdırma zamanı Xaçmaz Su Meliorasiya Sistemlərinin İstismarı İdarəsinin "Sahil" Sudan İstifadə edənlər Birliyinin sədri Akif Allahqulu oğlu Babayev tərəfindən 30 kubmetr həcmində qum-çınqıl qarışığının qanunsuz şəkildə götürüldüyü müəyyən edilib.
Faktla bağlı təqsirkar şəxs barəsində İnzibati Xətalar Məcəlləsinin müvafiq maddəsinə əsasən akt və protokol tərtib olunub, ona cərimə tətbiq edilib.
Sakinlər ümid edirlər ki, növbəti xəbər kənd yolunun əvvəlki vəziyyətinə qaytarılması ilə bağlı olacaq.
Shimal.News mövzunu diqqətdə saxlayır.
