Quba rayonundakı Rustov-Xanəgah-Gürdəh avtomobil yolunda çökmələr yaranıb, asfalt örtüyü sıradan çıxıb, sakinlər sürüşmə təhlükəsindən narahatdırlar. Bu barədə ShimalNews Report-a istinadən 25 may tarixində məlumat verir.
Rustov-Xanəgah-Gürdəh avtomobil yolu inşa edilərək əhalinin istifadəsinə verilsə də, layihənin tamamlanmasından qısa müddət keçməsinə baxmayaraq, həmin yolun bəzi hissələri artıq istismar üçün yararsız hala düşüb.
Qeyd olunan ərazinin sakinləri bildiriblər ki, yolda yaranmış kiçik yarğanlar avtomobillərin hərəkət etməsinə ciddi problem yaradır, nəqliyyat vasitələrinin sıradan çıxmasına səbəb olur. Yolun dağılmış hissəsində artan sürüşmə təhlükəsi sakinlərin ciddi narahatlığına səbəb olub.
Bəhs edilən yolun həm kənd təsərrüfatı, həm də turistik baxımdan əhəmiyyətli olduğunu nəzərə aldıqda bu problemin ciddiliyi haqda təsəvvür yaranır.
Yerli sakinlər iddia edirlər ki, onların problemin aradan qaldırılması üçün aidiyyəti qurumlara ünvanladıqları davamlı müraciətlərə diqqət yetirilmir.
Azərbaycan Avtomobil Yolları Dövlət Agentliyinin mətbuat katibi Anar Nəcəfli bildirib ki, sözügedən yerli əhəmiyyətli yolda yaranmış problemlə bağlı qurumun məlumatı var.
“Əraziyə müvafiq baxış keçiriləcək. Nə problem varsa, aradan qaldırılacaq, - A.Nəcəfli qeyd edib.
