Quba rayonunun Elbir (Vladimirovka) kəndində yeni salınan yaşayış massivinin sakinləri qaz problemi ilə üzləşiblər.
Shimal.News-a danışan sakinlərin sözlərinə görə, kəndin digər hissələri illər əvvəl təbii qazla təmin olunsa da, yeni massivdə yaşayan 400-ə yaxın abonent hələ də mavi yanacaqdan istifadə edə bilmir.
Bir müddət əvvəl "Azəriqaz" tərəfindən ərazidə qazlaşdırma işləri aparılıb və yeni xətlər çəkilib. Lakin xətlər çəkilsə də, evlərə qaz sayğacları quraşdırılmayıb. Abonentlərin mənzillərinə qaz verilişi həyata keçirilməyib.
Sakinlərin sözlərinə görə, onlara sayğacların quraşdırılması üçün fərdi yaşayış evlərinin çıxarışının olması tələb kimi bildirilib. Massivdəki evlərin böyük əksəriyyətinin çıxarışının olmaması isə problemin həllini çətinləşdirib.
Nəticədə çəkilən qaz xətləri sakinlərin evlərinə mavi yanacaq gətirmək əvəzinə, onların ifadəsi ilə desək, "göz dağına" çevrilib.
Sakinlər aidiyyəti qurumlardan məsələyə aydınlıq gətirilməsini və qaz xəttinin çəkildiyi ərazidə abonentlərin təbii qazla təmin olunması üçün problemin həllinə köməklik göstərilməsini istəyirlər.
