Qax rayonunda ata oğlunu bıçaqlayıb.
Hadisə rayonun Qaxbaş kəndi ərazisində baş verib.
Kənd sakini, 1970-ci il təvəllüdlü İmran Fərəcov (ad və soyad şərtidir) evdə olarkən oğlu ilə telefonla danışıb. Oğlu kənd ərazisindəki kafedə pivə içdiyini bildirib.
Bir müddət sonra oğlu kafedən çıxarkən dostlarından biri onu evinə qonaq dəvət edib. O, dəvəti qəbul edərək dostunun evinə gedib və atasına zəng edərək həmin evdə qonaq olduğunu bildirib.
İmran Fərəcov oğlunun ardınca həmin ünvana gedib. Evdə məclis olduğunu görən İ.Fərəcov ev sahibinin dəvəti ilə məclisə qoşulub. Birlikdə yeyib-içdikdən sonra ata və oğul evə qayıdıblar.
Evdə İ.Fərəcov oğluna işləməməsini irad tutub. Bundan sonra ata ilə oğul arasında mübahisə yaranıb. Mübahisə zamanı İ.Fərəcov oğlunu bıçaqlayıb.
Yaralı xəstəxanaya yerləşdirilib. Polis əməkdaşlarının keçirdiyi tədbirlər nəticəsində İ.Fərəcov saxlanılıb.
Faktla bağlı cinayət işi başlanıb və iş baxılması üçün Şəki Ağır Cinayətlər Məhkəməsinə göndərilib.
Məhkəmənin hökmü ilə İ.Fərəcov 3 il müddətinə azadlıqdan məhrumetmə cəzasına məhkum edilib. Ona 2 il sınaq müddəti müəyyən edilməklə cəzası şərti hesab olunub.
Mənbə: Oxu.аz
