Nabranda yerləşən istirahət mərkəzinin rəhbəri ürək çatışmazlığından dünyasını dəyişib.
"Atlant" Ailəvi İstirahət Mərkəzinin rəhbəri Tahir Qədəşovun nəşi bu gün Bakıdan Qubaya gətiriləcək. O, ata yurdu olan İsnov kəndində torpağa tapşırılacaq.
Qeyd edək ki, Tahir Qədəşovun kürəkəni, "Təbriz" MTK-nın rəhbəri və "Atlant" istirahət mərkəzinin şəriklərindən biri Nofəl Hacıyev noyabrın 16-da Bakı Ağır Cinayətlər Məhkəməsinin hökmü ilə 11 il 6 ay müddətinə azadlıqdan məhrum edilib.
İttihama görə, Hacıyev 2018–2022-ci illərdə tikilməkdə olan binalardakı mənzilləri bir neçə şəxsə sataraq 171 vətəndaşın 14 milyon manatdan çox pulunu dələduzluq yolu ilə ələ keçirib. İstintaq materiallarında həmin vəsaitin bir hissəsinin "Atlant" istirahət mərkəzinin təmir-tikinti işlərinə yönəldildiyi bildirilib.
Məhkəmənin qərarı ilə istirahət kompleksi də müsadirə olunub. Onun hərrac yolu ilə satılması, əldə ediləcək vəsaitin zərərçəkmiş şəxslərə dəymiş ziyanın ödənilməsinə yönəldilməsi nəzərdə tutulub.
İş üzrə digər təqsirləndirilən şəxs, "Təbriz" MTK-nın icraçı direktoru Talış Məhəmmədova isə şərti cəza verilib.
Mənbə: Bizim.Media