Qəbələnin Vəndam qəsəbəsinin Girvə yaşayış massivində sakinlər qaz probleminə görə çətin vəziyyətdə qaldıqlarını bildirirlər.
Shimal.News xəbər verir ki, sakinlərin sözlərinə görə, yaşayış massivində uzun illərdir təbii qaz yoxdur. Bu səbəbdən onlar qış aylarında evlərini qızdırmaq, yemək bişirmək və su qızdırmaq üçün əsasən odun və balon qazından istifadə edirlər.
Vətəndaşlardan biri 35 ildir ərazidə yaşadığını və bu müddət ərzində evlərinə qaz çəkilmədiyini bildirib.
"Əkdiyimiz ağacın barını götürüb, sonra kökündən kəsib odun edirik. Həyətdə ağac da qalmayıb. Nə edək? Qaz yoxdur, odun da bahadır", – deyə sakin bildirib.
Vətəndaşların sözlərinə görə, bir maşın odunun qiyməti 600-700 manata, bəzi hallarda isə daha yüksək məbləğə başa gəlir. Bir ailənin qış mövsümündə oduna çəkdiyi xərcin 1500-1600 manata çatdığı deyilir.
Sakinlər balon qazının da onlar üçün baha olduğunu bildirirlər. Onların sözlərinə görə, bir balon qazın qiyməti təxminən 70-80 manatdır.
"Uşaqlarımız səhər məktəbə gedir. Saat 4-dən qalxırıq ki, onlara çay, yemək hazırlayaq. Sağımızda qaz var, solumuzda qaz var, amma biz ortada qalmışıq", – sakinlərdən biri deyib.
Daha ətraflı Baku TV-nin videosunda.
