Xaçmaz rayonunun Nabran kəndinin Turist qəsəbəsində vəziyyət heç də ürəkaçan deyil. Sakinlər uzun müddətdir ki, bərbad yollar və antisanitariya problemindən əziyyət çəkirlər.
Shimal.News-a danışan sakinlərin sözlərinə görə, qəsəbənin daxili yolları təmirə ehtiyac duyur. Yağan yağışlardan sonra yollarda yaranan dərin gölməçələr və palçıq qatı nəqliyyat vasitələrinin hərəkətini iflic edir. Piyadaların gediş-gəlişini isə demək olar ki, qeyri-mümkün hala gətirir.
Bununla yanaşı, ərazi ekoloji problemlərlə də üz-üzədir. Yaşıllıq ərazilər müxtəlif məişət tullantıları, plastik qablar və lazımsız materiallarla çirkləndirilib. Turizm bölgəsi kimi tanınan bir yerdə belə mənzərələrin hökm sürməsi həm yerli sakinlərin haqlı narazılığına səbəb olur, həm də bölgənin imicinə kölgə salır.
Sakinlər aidiyyəti qurumlardan yolların asfaltlanması, eləcə də ərazinin tullantılardan təmizlənməsi üçün təcili tədbir görülməsini xahiş edirlər.
