Şimal rayonlarında xəstəxanalara müraciət edən bəzi pasiyentlər iki gündür həkim qəbuluna və müayinələrə yönləndirilmədə çətinliyin olduğundan şikayətçidirlər.
Sakinlərin Shimal.News-a bildirdiyinə görə, problem TƏBİB-in istifadə etdiyi elektron sistemdə yaranan texniki nasazlıqla əlaqədardır.
Pasiyent həkim qəbuluna yazılmaq üçün əvvəlcə qeydiyyatdan keçərək talon götürməlidir. Həkim isə həmin talon əsasında xəstəni laborator analiz, rentgen, ultrasəs müayinəsi, kardiogram və digər tibbi xidmətlərə yönləndirir.
Sakinlərin iddiasına görə, sistem işləmədiyi üçün talon rəsmiləşdirilə bilmir və nəticədə müayinələrdən keçmək mümkün olmur.
Narazılıq xüsusilə analiz vermək üçün səhər saatlarında xəstəxanaya gələn vətəndaşlar arasında yaranıb. Bildirilir ki, bəzi pasiyentlər acqarına analiz vermək üçün xəstəxanaya gəlsələr də, uzun müddət gözlədikdən sonra xidmət ala bilmədən geri qayıtmalı olublar.
Məsələnin Şimal rayonları ilə yanaşı, digər ərazilərdə də müşahidə olunduğu bildirilir. Sakinlər problemin qısa müddətdə aradan qaldırılmasını və tibbi xidmətlərin normal qaydada bərpa edilməsini istəyirlər.
