İsmayıllı rayonunun bir neçə məhəlləsində kanalizasiya qapaqlarının yerdən hündür olması sakinlərin narahatlığına səbəb olur. Bu haqda ShimalNews 23 yanvar tarixində “Bizim.Media”ya istinadən məlumat verir.
Füzuli küçəsinin 2-ci dalanında, Zeynalabdin Tağıyev və Babadağ küçələrində quyuların hündürlüyü yerdən təqribən 7 sm-dən hündürdür. Təqribən 9 ilə yaxındır ki, bu hal yaşanır. Sürücülər hər dəfə avtomobillərinin altının dəyməsindən və əzilməsindən əziyyət çəkirlər.
Məsələ ilə bağlı İsmayıllı Sukanal İdarəsinin baş mühəndisi Kənan Muradəliyev bildirib ki, yolların asfalt olmayan hissəsində qapaqların hündürlüyü 15-20 sm olaraq nəzərdə tutulub:
“Bunun səbəbi isə qısa müddət ərzində həmin küçələrdə asfaltlama işlərinin başlanacağının deyilməsi idi. Belə olan halda isə bu hündürlük təmin olunmasa, kanalizasiya qapaqları asfaltın altında qalacaqdı”.
İsmayıllı rayon İcra Hakimiyyətindən isə bildirilib ki, adıçəkilən ərazilərdə bu ilin sonuna kimi asfalt örtüyü salınacaq.
