Quba Rayon Mərkəzi Xəstəxanasında yoxlamalar keçirilib.
Qaynarinfo.az-ın məlumatına görə, Dövlət Yanğın Nəzarəti Xidməti tərəfindən xəstəxana rəhbərliyi barəsində inzibati protokol tərtib olunub. İş yanğın təhlükəsizliyi qaydalarının pozulması ilə bağlı İnzibati Xətalar Məcəlləsinin 518.1-ci maddəsi üzrə rəsmiləşdirilərək məhkəməyə göndərilib.
Araşdırma zamanı məlum olub ki, xəstəxana binası yanğın xəbərverici siqnalizasiya qurğuları ilə təmin edilməyib. Bundan əlavə, obyektin elektrik naqillərinin Elektrik Qurğularının Quraşdırılması Qaydalarına uyğun çəkilmədiyi müəyyən edilib.
Yoxlama zamanı həmçinin elektrik naqillərinin izolyasiyasının müqavimətinin yoxlanılması ilə bağlı müvafiq aktın tərtib olunmadığı, tikintidə istifadə edilən taxta konstruksiyaların odadavamlı məhlulla hopdurulmasına dair sənədin təqdim edilmədiyi aşkarlanıb. Bununla yanaşı, binanın ilkin yanğınsöndürmə vasitələri ilə təminatının qənaətbəxş olmadığı, ümumilikdə yalnız bir ədəd odsöndürən balonun mövcud olduğu müəyyən edilib.
Məhkəmənin qərarına əsasən, xəstəxananın direktoru Əliyar Sərvərov qeyd olunan maddə üzrə təqsirli bilinərək 350 manat məbləğində cərimə olunub.
