Xaçmazda bu il Ağtala camaatı üçün kənd yollarının bərbad vəziyyətə salınması ilə yadda qalıb.
Shimal.News-a müraciət edən kəndlilər bildirirlər ki, mart ayından etibarən Su İdarəsi Qusarçay yatağından 80 "KamAz"dan çox çınqıl çıxarıb və həmin maşınlar kənd yollarını demək olar ki, yararsız hala salıblar.
Sakinlərə ən çox təsir edən isə odur ki, onlar şəxsi vəsait hesabına təmir işləri aparırlar. Ağır tonnajlı yük maşınları isə "su kəməri yolu" da daxil olmaqla kənd yollarına ziyan vurur. Dövlət qurumları isə bu işdə yalnız vəd verməklə kifayətlənirlər:
"Su İdarəsinin əməkdaşı Kamil müəllim oktyabrda dedi ki, bura su kəmərinin yoludur, amma narahat olmayın – yolu bərpa edəcəyik. İl bitdi, hələ də bir daş belə yola qoyulmayıb. Bu yoldan hər gün 500-600 nəfər istifadə edir. Təkcə Ağtala yox, qonşu kəndlərin sakinləri də bu 2 kilometrlik çətin yolda hər gün əziyyət çəkir".
Ağtala camaatı aidiyyəti qurumlardan təcili tədbirlərin görülməsini, kənd yolunun əvvəlki vəziyyətinə qaytarılmasını tələb edir. Eləcə də Ekologiya və Təbii Sərvətlər Nazirliyin çınqıl hasilatının qanuni olub-olmamasını araşdıracaqlarına dair vədlərini yerinə yetirməsini gözləyirlər.
Shimal.News məsələni diqqətdə saxlayır və cavabdeh qurumların mövqeyini dərc etməyə hazırdır.
