Xaçmazdan yayımlanan “RTV”də aparıcı kimi fəaliyyətə başlayan Şaiq Ağayevin hər kəs tərəfindən bilinməyən başqa bir istedadı var. Bu haqda ShimalNews 23 fevral tarixində “Azərtac”a istinadən məlumat verir.
Hazırda Şaiq tamaşaçıları AZTV-nin “Telesəhər” proqramından salamlayır. Amma bu gün mövzu onun Azərbaycanda metal üzərində bədii döymə sənətini yaşadan azsaylı sənətkarlardan olmasıdır.
Mürşüdoba kəndində anadan olan Şaiq Azərbaycan İncəsənət Universitetinin Estrada aktyoru fakültəsinin məzunudur. Hələ uşaq yaşlarından metal üzərində bədii döymə sənətinə maraq göstərib.
“Əmimin əl işlərinə baxıb həvəslənirdim. Amma o vaxt bədii döymə üçün metal lövhələr tapmaq çətin idi. Mən də dəmirdən hazırlanan yağ qablarını kəsib, lövhələr əldə edirdim. Amma həmin metal tez paslanır, rəngini dəyişir - bir sözlə, zay olurdu. Çətin olsa da, bədii döymənin sirlərini öyrənməyi bacardım və bu iş mənim hobbimə çevrildi. İndi artıq bu işlə daha ciddi məşğul oluram. Hətta ABAD ilə əməkdaşlıq da edirəm. Hazırladığım əl işlərinə xarici turistlər tərəfindən böyük maraq var”, - deyə Şaiq Ağayev söyləyir.
Sənətkar, əsasən, istirahət günlərində və işdən evə qayıtdıqdan sonra misgərliklə məşğul olur. Dediyinə görə, bəzən axşam saatlarından səhərə kimi əl işi üzərində çalışır:
“Buta, Qız qalası, Xarıbülbül, Nar simvollarına daha çox üstünlük verirəm. Əl işini hazırlamaq üçün əvvəlcə böyük mis lövhədən uyğun ölçüdə parça kəsirəm. Sonra həmin lövhənin üzərində hazırlayacağım əl işinin eskizini cızıram. Daha sonra fiqur kəsilir, kənarları hamarlanır, üzərinə naxışlar vurulur. Mis lövhə üzərində bir şəkli canlandırmaq çox səbir tələb edən işdir. Əsəri metal üzərində döyməklə iş bitmir. Əsər həkk olunan metal lövhə cilalanaraq, kimyəvi məhlullarla işlənilir ki, parlaq rəng alınsın”.
Xarici turistlər həmin suvenirləri Azərbaycandan xatirə olaraq alırlar. Onun hazırladığı suvenirlər “ABAD”ın etnobutiklərində 17-18 manata satışa çıxarılır.
Şaiq Ağayev gələcəkdə əsərlərindən ibarət sərgi açmağı da planlaşdırır.
[caption id="attachment_56510" align="alignnone" width="640"]
[/caption]
