Bu gün 3-cü Türk dünyası ədəbiyyat və kitab festivalında əslən Xaçmazdan olan Əməkdar jurnalist Əntiqə Qonaq imza günü keçirib. Bu haqda ShimalNews 24 may tarixində “Bizim.Media”-ya istinadən məlumat verir.
İmzalanan “Xaçmazlı döyüşçülər” adlı üçcildlikdə böyük Zəfərimizlə başa çatan 44 günlük savaşın qalibiyyətinə imza atan qazi və veteranlarımız haqda məlumat xarakterli yazılar yer alıb.
Tədbir AMEA-nın parkında (Hüseyn Cavid prospekti) səkkiz gün (mayın 31-dək) davam edəcək. Festivalın hər günü müəyyən bir ölkəyə – Azərbaycan, Qırğızıstan, Özbəkistan, Macarıstan, Qazaxıstan, Türkiyə, Türkmənistan və Şimali Kipr Türk Cümhuriyyətinə həsr olunacaq.
Türksoylu ölkələrdən tanınmış alimlərin, qələm adamlarının, naşirlərin dəvət edildiyi festivalda şeir saatları, müzakirələr, kitab təqdimatları, elmi konfranslar, konsert proqramları ilə yanaşı, görkəmli ədiblərin yubileylərinə həsr olunan tədbirlər də təşkil olunacaq.
