Xaçmaz rayonunda turizm zonalarında yerləşən çimərliklərdə və yol kənarlarında təmizlik işləri aparılıb. Bu barədə ShimalNews 20 aprel tarixində məlumat verir.
"Yaşıl dünya naminə həmrəylik ili" çərçivəsində İcra Hakimiyyətinin, 5 saylı Regional Ekologiya və Təbii Sərvətlər İdarəsinin, yerli icra nümayəndəliklərinin və bələdiyyələrin işçiləri, eləcə də sakinlər abadlıqda fəal iştirak ediblər.
Dəniz sahilinə yığılan tullantılar, həmçinin dalğaların sahilə atdığı müxtəlif əşyalar yığışdırılıb, digər təmizlik işləri görülüb. Toplanan zibil qalıqlarının daşınması təmin edilib.
Çimərlik mövsümünə kimi Nabran turizm zonası da daxil olmaqla bütün sahil zolaqlarının tullantılardan təmizlənməsi nəzərdə tutulub. Aksiya zamanı, eləcə də Gəndob-Yalama və Quba-Xaçmaz yolunun kənarında təmizlik işləri aparılıb, mövcud yaşıllıqlara aqrotexniki qulluq göstərilib, ağacların suvarılması təmin edilib.
