Xaçmazda şəhid anasının və bir neçə adamın pulunu mənimsəyən qadınlar barəsində cinayət işinə xitam verilib. Bu haqda ShimalNews 8 fevral tarixində məlumat verir.
37 yaşlı Nuranə Orucova Vətən müharibəsində şəhid olan Əliheydər Hüseynlinin anasına zəng edib və özünü Müdafiə Nazirliyinin vəzifəli şəxsi kimi təqdim edib. Ona oğlunun sağ olduğunu bildirərək sağ-salamat qayıtması üçün 4.000 manat pul alıb.
Nuranə, həmçinin həmkəndlisi Sabrina Süleymanova ilə əlbir olaraq, müxtəlif şəxslərə məktəbdə işə düzəldəcəyinə dair vəd verib. Bunun qarşılığında isə onlardan müxtəlif məbləğlərdə pul alıb. Mənimsənilən ümumi məbləğ 20.000 manat təşkil edib.
Sumqayıt Ağır Cinayətlər Məhkəməsində işlə bağlı proses keçirilib. Dövlət ittihamçısı təqsirləndirilən şəxslərin dəymiş ziyanı ödədiklərini nəzərə alaraq, cinayət məsuliyyətindən azad olunmalarını istəyib.
Daha sonra hökm elan olunub. Bildirilib ki, məhkəmə istintaqı zamanı şəhid anasına dəymiş ziyanın tam ödənilməsi təmin edilib, şəhid anası təqsirləndirilən şəxslə barışdığını, ondan heç bir şikayətinin olmadığını bildirib. Nuranə Orucova və Sabrina Süleymanova barəsində olan cinayət işinə də xitam verilib.
Eləcə də məhkəmə Nuranəyə 2000 manat məbləğində cərimə tətbiq edib. Ödənişin 6 ay ərzində təmin olunması tələb olunub.
