Xaçmaz rayonunda yanğından mühafizə mövzusunda regional müşavirə keçirilib. Bu haqda 15 aprel tarixində Shimal News Ekologiya və Təbii Sərvətlər Nazirliyinə istinadən xəbər verir.
Görüşdə yanğın təhlükəsizliyi ilə bağlı hazırlanmış birgə fəaliyyət planı, yanğına qarşı qabaqlayıcı tədbirlərin səmərəliliyinin artırılması barədə məlumat verilib. Bundan əlavə, qarşıdan yay mövsümünün gəlməsi ilə əlaqədar meşə və yaşıllıq ərazilərdə yanğınların baş verməməsi üçün kənd təsərrüfatı ilə məşğul olan sahibkarların, fermerlərin, meşə ətrafında yaşayan kənd sakinlərinin, heyvandarlıq və əkinçiliklə məşğul olan vətəndaşların odla ehtiyatlı davranmaları, yanğın təhlükəsizliyi qaydalarına ciddi əməl olunmasının vacibliyi xüsusi qeyd edilib.
Tədbirdə Ekologiya və Təbii Sərvətlər, Fövqəladə Hallar və Kənd Təsərrüfatı nazirliklərinin nazir müavinləri, Daxili İşlər Nazirliyi, Baş Prokurorluq və “Azəriqaz” İstehsalat Birliyi rəsmiləri, icra hakimiyyəti nümayəndələri, fermer və sahibkarlar iştirak ediblər.
