Xaçmazda Novruz bayramının İlaxır çərşənbələrinin üçüncüsü təntənə ilə təşkil edilib. Bu barədə ShimalNews 13 mart tarixində məlumat verir.
Niyazabad kəndində Yel çərşənbəsi qədim adət-ənənələrə uyğun qeyd olunub. Bayram şənliyində elimizin qədim adət-ənənələri nümayiş etdirilib - sac üstündə yuxa bişirilib, buğda təmizlənib, qovurğa qovrulub. Gənclər milli qeyimdə və xüsusi bəzədilmiş faytonla kəndi gəzərək bayramın başlanması barədə xəbər yayıblar. Kosa və Keçəl camaatla yumurta döyüşdürüb və zarafatlar ediblər. Xalq oyunlarının təbliğ olunduğu səhnəciklərdə yeniyetmələr güləşib, “Ənzəli” oynayıblar. Uşaqlar bayram tonqalı üstündən atlanaraq əyləniblər.
